SHPËRNDAJE

Kryetari i Lëvizjes për Bashkim, Valon Murati ka propozuar formimin e një qeveri të unitetit, për të ndërtuar një platformë për bisedimet me Serbinë, ku do të përfshihej dhe Lugina e Preshevës.

Murati ka thënë se mungesa e një vizionin nga forcat kryesore politike shqiptare për të formuar një qeveri të unitetit, ka fuqizuar Listën Serbe, që sipas tij, kjo u dëshmua edhe sot.

Ai me anë të një postimi në Facebook, ka thënë se tani është koha e duhur për formimin e një qeverie të tillë e përbërë nga të gjitha partitë shqiptare.

Postimi i plotë i tijë:

 

Një qeveri uniteti për të ndërtuar platformën për bisedime që do të përmbante brenda saj edhe Kosovën Lindore

Që nga themelimi i kësaj qeveria, forcat politike shqiptare përmes mungesës së vizionit për të ndërtuar një qeveri uniteti, kanë fuqizuar pozicionet e Listës Serbe. Kjo u pa edhe sot, në lojërat aspak parimore në mes të pozitës dhe opozitës në Kuvendin e Kosovës.

Ky është momenti i duhur për të gjitha partitë politike parlamentare për ta tejkaluar veten dhe për të shkuar drejt një qeverie uniteti e përbërë nga krejt partitë politike shqiptare.

Në këto rrethana kjo qeveri do të duhej ta kishte një mision: hartimin e platformës politike për bisedime me Serbinë dhe përpjekjen për të përmbyllur këto bisedime.

Në qendër të platformës, LB beson se duhet të jetë parimi i reciprocitetit në të drejta për shqiptarët në Kosovën Lindore me atë të serbëve në tri komunat veriore të Kosovës. Zbatimi me konsekuencë i këtij parimi do të çonte edhe në ridefinimin e kufijve në mes të dy popujve dhe shteteve duke u bazuar në vullnetin e tyre në këto pjesë përkatëse.

Beteja politike në mbrojtje të “integritetit territorial” të Kosovës e në dëm të Kosovës Lindore dhe funksionalizimit të shtetit të Kosovës duhet të pushojë. Qeveria e unitetit duke hartuar platformë të përbashkët do të ndërtonte edhe ekipin i cili do të përfaqësonte Kosovën, duke i eliminuar nga ky proces të gjithë ata që nuk e kanë besimin e forcave politike për këtë proces të ndjeshëm politik.

Rrugët tjera do të na çojnë në vazhdimin e konflikteve të brendshme, përpjekjen për të fituar poena politik nga situate aktuale, fuqizim të Listës Serbe dhe humbje e rastit që përmes një zgjidhjeje të duhur në bisedime të funksionalizojmë shtetin e Kosovës dhe ta hapim rrugën për bashkimin në mes të Kosovës dhe Shqipërisë.