Këmbimi i pronave, Murati: Kjo çështje nuk i takon MF-së, sqarimet kërkoni tek udhëheqësia e Komunës së Prishtinës – Telegrafi

0
34

Ministri i Financave, Hekuran Murati ka folur për çështjen e këmbimit të pronës komunale me pronën private në Komunën e Prishtinës.

Murati ka deklaruar se kjo çështje nuk i takon Ministrisë së Financave dhe se për çdo sqarim lidhur me këtë çështje duhet të kërkohet te Komuna e Prishtinës.

“Këmbimi i pronave vendimet merren nga Komuna e Prishtinës, nuk i takon Ministrisë së Financave të mbaj qëndrim apo të përfshihet në diskutim që ka pretendime të pasakta. Sa i përket çështjes së ndalimit të keqpërdorimeve, nuk besoj që ka dikush që ka bërë më shumë se unë për ndaluar sidomos keqpërdorimet tek shpronësimet. Kemi rastin e 43 milionë euro të rrugës Kiev-Zahaq që është ndalu për shkak se ka pas dyfishim të vlerave me vendim të Qeverisë”, tha Murati.

Ministri theksoi se sa ka informacion çështja e këmbimit të pronave është rikthyer në rinvendosje të Komunës së Prishtinës.

“Është pikërisht grupi i asamblistëve të LVV që e ka ekspozuar dhe ka deklaruar që është shkelje çfarë po bëhet dhe se një këmbim i tillë nuk paraqet interes publik, dhe po ata kanë propozuar që të ketë anulim të këtij vendimi”, ka deklaruar Murati.

Ministria e Administrimit të Pushtetit Lokal (MAPL), i ka dërguar një letër Komunës së Prishtinës, përmes së cilës ka kërkuar që vendimi për këmbim të pronës komunale me pronën private të rishqyrtohet dhe të harmonizohet në pajtim me legjislacionin në fuqi. Sipas ministrisë, kjo duhet të bëhet brenda afatit prej 30 ditësh.

Prona komunale që është këmbyer me atë në Badoc të ish-klientit të kryetarit të Prishtinës, Përparim Rama, nga një proces i nisur më 2021 nga ish-kryetari Shpend Ahmeti dhe një proces i ri i vitit 2024, kap vlerën e dhjetëra miliona eurove.

Bazuar në çmimet në treg, një pronë rreth 7-hektarëshe në zonën Prishtina e Re më së liri kushton 23 milionë euro, ndërsa më së shtrenjti rreth 33 milionë euro. E për sipërfaqen që është këmbyer në Badoc, çmimet sillen prej 2 milionë e 400 mijë deri në 5 milionë e 300 mijë euro. /Telegrafi/