Mërgim Vojvoda i shpëton mrekullisht aksidentit me veturë – Telegrafi

0
52

Mërgim Vojvoda, mbrojtësi i njohur i Torinos dhe pjesë e Përfaqësueses së Kosovës, ka përjetuar një ngjarje të papritur mëngjesin e së enjtes në rrugët e qytetit të njohur italian.

Para se të nisej drejt qendrës stërvitore për angazhimet e përditshme futbollistike, Vojvoda u bë protagonist i një aksidenti me veturën e tij Mercedes. Pavarësisht përplasjes, fatmirësisht ai doli pa lëndime fizike, sipas raportimeve të “Tuttosport”.

Aksidenti ndodhi në Corso Galileo Ferraris, një nga rrugët e qytetit, ku Mercedesi i futbollistit u përplas me një Jeep. Ngjarja jo vetëm që shkaktoi tronditje, por gjithashtu la pasojë dëmtime të konsiderueshme materiale në automjetin e Vojvodës.

Mediat italiane përcjellin se, pavarësisht dëmtimeve që mori vetura, sistemi i sigurisë i automjetit – ‘airbagu’ – vepronte siç duhet, duke e mbrojtur Vojvodën nga çdo lëndim i mundshëm që mund të rrjedhte nga aksidenti.

Pas incidentit, Vojvoda nuk lejoi që aksidenti të pengonte rutinën e tij. Ai mbërriti me vonesë të vogël në qendrën stërvitore të Torinos, ku u angazhua në seancën e stërvitjes ashtu siç ishte parashikuar.

Kjo tregon jo vetëm profesionalizmin, por edhe qëndrueshmërinë e tij përballë situatave të paparashikueshme dhe sfiduese në jetën e përditshme. /Telegrafi/