SHPËRNDAJE

Aksioni “Lies!” (Lexo!) i shpërndarjes së Kuranit rrugëve të qyteteve, në të ardhmen mund të mos ketë vend në zonat e këmbësorëve të qyteteve në Kantonin e Cyrihut. Drejtoria e Sigurisë e këtij kantoni u ka rekomanduar të gjitha komunave që i ka nën kompetencë që t`i hedhin poshtë kërkesat për këto aksione në qytetet përkatëse, bën të ditur srf.ch.

Ka dëshmi sipas të cilave aksioni i tillë i shpërndarjes së Kuranit shërben vetëm për të rekrutuar mbështetës, njofton Drejtoria e Sigurisë, në krye të së cilës është Mario Fehr nga Partia Socialdemokrate, shkruan albinfo.ch.

Shteti nuk obligohet të vejë në dispozicion hapësira për grupet “pikëpamjet e të cilave nuk përputhen me vlerat tona”. Për këtë arsye aksionet “Lies!” mund të ndalohen. Këtë vendim Drejtoria e Sigurisë e ka marrë, duke u mbështetur në një ekspertizë juridike.

Organizator i këtij aksioni është shoqata “Religjioni i vërtetë”. Në Gjermani, ky grupim salafist është ndaluar në nëntor të vitit 2016, nën dyshimin se përhap porosi të urrejtjes dhe vepron në mënyrë kundërkushtetuese. Shoqata është themeluar nga gjermani me prejardhje palestineze Abou Nagie.

Salafistët përfaqësojnë islamin konservativ, refuzojnë demokracinë perëndimore dhe synojnë një sistem juridik islamik.

Në Zvicër kjo organizatë është aktive në të gjitha qytetet e mëdha, si në Cyrih, Bernë, Winterthur dhe më tutje, në qytete tjera të Zvicrës frankofone. Nuk dihet për numrin e librave që deri tash kjo organizatë ka shpërndarë.

Shefi për Siguri në Kantonin e Cyrihut, Mario Fehr ka deklaruar se do ta parapëlqente një vendim të tillë negativ në nivel të vendit., përcjell albinfo.ch. Për këtë arsye ai ka kërkuar nga autoritetet federale që ta ndalojnë këtë aksion me rastin e hyrjes në fuqi të ligjit të ri për shërbimin informativ, në shtator të këtij viti.

Përveç Cyrihut, përpjekje të ngjashme, në drejtim të ndalimit të aksionit të përmendur po zhvillohen edhe në qytete dhe kantone tjera si në Bazel, Lucern etj.