SHPËRNDAJE

Çdo person në Zvicër brenda një dite kalon mesatarisht 36.8 kilometra në trafik. Kjo shifër i referohet vitit 2015, pasi që në atë vit është bërë raporti i fundit me këtë temë. Sipas zyrës Federale për Statistikë, kilometrazhi i përmendur nuk ndryshon pothuajse fare nga viti 2010, kur ishte realizuar dhe publikuar raporti i parafundit mbi mobilitetin e zviceranëve, shkruan srf.ch.

Koha që zviceranët kalojnë për të bërë këtë distancë është mesatarisht një orë e gjysmë, ndërsa mjeti teknik numër një i përdorur në trafik është automobili, transmeton albinfo.ch. Pothuaj dy të tretat e zviceranëve e kalojnë këtë distancë me veturat e tyre private. Nga ana tjetër, shfrytëzimi i transportit hekurudhor ka shënuar një rritje të vogël gjatë pesë viteve në mes të dy raporteve.

Me gjithë rritjen e regjistruar, edhe më tutje vetëm 20 për qind të zviceranëve përdorin trenin si mjet transporti. Ndodh kështu edhe pse Zvicra është kampione absolute në Evropë (dhe e dyta në botë, pas Japonisë) për shfrytëzim të trenit.

Raporti zbulon po ashtu se edhe në ditë pune, më së shumti kilometra zviceranët kalojnë në rrugë gjatë aktiviteteve të lira (pas orarit të punës).