Pioli konfirmon prezencën e Leaos për duelin ndaj Newcastle – Telegrafi

0
38

Stefano Pioli ka konfirmuar se Rafael Leao është i gatshëm për të startuar ndaj Newcastle në ndeshjen me rëndësi jetike për kuqezinjtë dhe me Piolin që e di se Milani duhet të fitojë patjetër.

Milan do të udhëtojë për në “St James Park” teksa janë të pozicionuar në vendin e katërt në grup, por ende kanë shanse që të sigurojnë kualifikimin në mesin e 16 më të mirave, në rast se mposhtin Newcastlen dhe nëse PSG-ja humbet ndaj Dortmundit në “Signal Iduna Park”.

Gjatë konferencës për shtyp, Pioli tha se ai dhe ekipi i tij janë në dijeni të plotë për situatën në të cilën ndodhen dhe e dijnë se çfarë duhet të ndodh mbrëmjen e së mërkurës.

“Ne e dimë se çfarë na pret neve, kush është kundërshtari dhe çfarë atmosfere do të ketë. Do të jetë testi i parë i këtij sezoni”, ka thënë fillimisht Pioli.

Kur u pyet nëse kjo ishte ndeshja me e rëndësishme në karrierën e tij si trajner i Milanit, Pioli tha se deri në këtë fazë të sezonit është më e rëndësishmja.

“Është shumë e rëndësishme, ne kemi luajtur shumë ndeshje të nivelit të lartë, por deri më tani këtë sezon, definitivisht është ndeshja më e rëndësishme”, shtoi ai.

“Ne e dimë rëndësinë e kësaj ndeshjeje dhe rëndësinë e të qenurit në Evropë. Ne presim të zhvillojmë një ndeshje të madhe ndaj një kundërshtari të vështirë”.

Ndërkohë, kur u pyet për gjendjen e Leaos, tekniku i Milanit konfirmoi se gjithçka është në rregull dhe ai do ta nis nga minuta e parë.

“Ai është mirë dhe do të luajë që nga minuta e parë”, kishte thënë shkurtimisht Pioli.

Në fund ai nuk u la pa u pyetur edhe për rikthimin e Zlatan Ibrahmovic në klub, për të cilin tha se është një vlerë e shtuar e klubit./Telegrafi/