SHPËRNDAJE

Kryetari n.d i komunës së Preshevës Shqiprim Arifi u takua me kryetarin e Parlamentit të Maqedonisë Talat Xhaferin.

“Sot, së bashku me zëvendës kryetarin e Alternativës, z. Armend Aliu, patëm takim shumë miqësor me kryetarin e parlamentit të republikës së Maqedonisë z. Talat Xhaferin. Theks të veçantë në takim ju dha çështjes shumë të prolonguar të hapjes së kalimit kufitar Miratoc – Llojan. Administrativisht, Republika e Sërbisë i ka përfunduar të gjitha procedurat lidhur me aktivizimin e kësaj pike kufitare, kanë mbetur procedura që duhen të përfundojnë nga institucionet e Republikës së Maqedonisë, për çka morëm garanca që Parlamenti me të cilin kryeson z. Xhaferi do të përkushtohet seriozisht për përfundimin e këtyre procedurave” ka shkruar Arifi në rrjetin social.

Sipas tij, Temë tjetër rreth së cilës u diskutua ishte edhe lejeqëndrimi i studentëve nga lugina e Preshevës që studijojnë në Republikën e Maqedonisë.

“U siguruam se po punohet në thjeshtëzimin e procedurave rreth lejeqëndrimit. Në fund të takimit mu dorëzua një kopje e draft ligjit për përdorimin e gjuhës shqipe në Republikën e Maqedonisë, që më dha shpresë se proceset drejtë realizimit të drejtave individuale dhe kolektive të shqiptarëve në regjion janë në rrugë të mbarë por nevojitet përkushtim dhe detyrim edhe më i madh në këtë sferë.” ka përfunduar Arifi.(presheva.com)