SHPËRNDAJE

Më shumë gola në fazën e grupeve dhe futbollisti i parë që shënon gol në gjashtë ndeshje me radhë po ashtu në grup, këto janë dy rekordet që sonte synon t’i thyejë Ronaldo kundër Dortmundit.
Cristiano Ronaldo nuk e ka nisur aspak mirë sezonin në La Liga, por në Ligën e Kampionëve ai ka shfaqur një tjetër fytyrë, raporton AS.

Cris, golashënuesi më i mirë i këtij edicioni, me tetë gola në 450 minuta (gol çdo 56’ minuta), do të tentojë të thyejë sonte dy rekorde në sfidën që Real Madridi e zhvillon në “Santiago Bernabeu” me Borussia Dortmundin.

Ai ka shënuar gol në pesë ndeshje me radhë në fazën e grupeve, duke barazuar Del Pieron, në 1995 dhe Rebrov, në 1997, por që të dy kishin dështuar të shënojnë edhe në ndeshjen e gjashtë, të fundit në fazën e grupeve.

Cristiano aktualisht është golashënuesi më i mirë në këtë garë, me 113 gola, golashënuesi më i mirë i një edicioni (17 gola në sezonin 2013/14 ku Reali pas 12 viteve fitoi La Deciman) dhe mbanë gjithashtu rekordin për më së shumti gola në fazën e grupeve, 11, që e arriti në sezonin 2015/16, që në fund u shpërblye me triumf në Milano kundër Atletico Madridit.

Pavarësisht kaq shumë golave dhe rekordeve, ai nuk ka arritur asnjëherë të shënojë gol në të gjitha ndeshjet (6) në fazën e grupeve dhe do të tentojë ta bëjë këtë sonte.

Rekordi tjetër që synon katër herë fituesi i “Topit të Artë” është ai i golashënuesit më të mirë në fazën e grupeve.

Lionel Messi i Barcelonës është i pari me 60 finalizime dhe për ta thyer këtë, Cris duhet të shënojë dy gola, pasi aktualisht ka 59 finalizime në karrierë në fazën e grupeve të Championsit.