Partia për Veprim Demokratik
17523 Preshevë, R. Sadiku 3
tel/fax: 017/660-086
e-mail: riza_halimi@yahoo.com

20.08.2007
P r e sh e v ë

K   U   M   T   E   S   Ë

e Kryesisë së Partisë për Veprim Demkratik

             Në mbledhjen e Kryesisë së përgjithshme të PVD-së, të mbajtur me rastin e 17 vjetorit të saj, u konstatua se më 19 gusht 1990 u krijuan parakushtet për organizim të pavarur politik të shqiptarëve në rajonin e Preshevës, Bujanocit dhe Medvegjës.

            Me këtë rast u vlerësua se, duke qenë gjithnjë e vetmja parti që ka infrastrukturë partiake në të tri komunat e rajonit, PVD vazhdon të bartë barrën kryesore në luftën politike për realizimin e të drejtave individuale dhe kolektive të shqiptarëve në Luginë të Preshevës të ciltë edhe më tutje po ballafaqohen me diskriminimin që po e ushtrojnë strukturat shtetërore të Republikës së Serbisë.

            Kryesia e PVD-së gjithashtu vlerëson se për shkak të bllokimit të realizimit të programit qeveritar aktualisht paraqiten probleme serioze në sferat më të ndieshme jetësore për shqiptarët e këtij rajoni.

            Në kushte kur vazhdojnë të mbeten të pazgjidhura probleme të ndieshme në arsim, kulturë, informim, në mbrojtjen shëndetësore dhe sociale, në përdorimin zyrtar të gjuhës shqipe dhe simbolit kombëtar shqiptar, e posaçërisht në rrethana të pazhvillueshmërisë ekstreme të rajonit, qeveria serbe po orientohet gjithnjë e më tepër në ruajtjen e qetësisë me anë të ndërtimit të bazave për forca speciale dhe me anë të militarizimit të skajshëm të rajonit.

            Pikërisht në kuadër të kësaj logjike militariste Luginën e Preshevës që nga formimi i qeverisë së re e kanë vizituar vetëm ministrat e mbrojtjes dhe policisë si dhe udhëheqësit e Trupit Koordinues të pareformuar, të cilët, duke kontaktuar vetëm me  strukturat ushtarake dhe të xhandarmerisë në teren dhe duke i injoruar dhe fyer përfaqësuesit legjitim të shqiptarëve në rajon, tregon qartë se kjo qeveri jo vetëm që i ka harruar obligimet, të pranuara edhe ndërkombtarisht me programin qeveritar të vitit 2001, por njëkohësisht tregon mungesën e sensit elementar për t’i dëgjuar problemet e ndieshme jetësore me të cilat një kohë të gjatë po ballafaqohen shqiptarët e këtij rajoni.

            Njësoj si në kohën e regjimit të Millosheviqit po injorohen kërkesat e përfaqësuesit të vetëm të Luginës së Preshevës në parlamentin e Serbisë për të dhënë sqarimet për monopolin që organet shtetërore po vazhdojnë t’ia sigurojnë firmave të Beogradit në shfrytëzimin e përmbajtjeve komerciale në kalimin kufitar të Preshevës si dhe për apartheidin klasik që po vazhdon të ushtrohet ndaj shqiptarëve në strukturat shtetërore dhe publike të këtij institucioni shetëror.

            Kryesia e PVD-së vlerëson se vetëm politika shtetërore e bazuar në diskriminimin etnik mund të prodhojë situata absurde në të cilat komuna e Preshevës, me mbi 90% popullatë shqiptare, në teritorin e së cilës me anë të përmbajtjeve të Kalimit Kufitar dhe të Koridorit 10 krijohen të hyra shumë të mëdha shtetërore, të vazhdojë të mbetet në të njejtën kohë komuna më e pazhvilluar në nivel shtetëror.

            Kur kemi parasyshë se qasja aktuale e qeverisë serbe ndaj Luginës së Preshevës nuk ka dallime esenciale nga praktika e regjimit të Millosheviqit, është krejtësisht real rreziku i reciklimit të skenareve katastrofale  të zhvilluar në këtë rajon në periudhën 1998-2001.

            Në situatë mjaft të ndieshme politike, dhe shumë të rëndë ekonomike, PVD do të intensifikojë luftën politike me anë të aktivitetit të deputetit në Parlamentin e R. së Serbisë dhe të strukturave të pushtetit lokal, mirëpo edhe me anë të tubimeve me veprimtarë dhe simpatizues, në të cilat që nga 8 shtatori do të debatohen të gjitha problemet me të cilat po ballafaqohet popullata shqiptare në Luginë të Preshevës.

            Njëkohësisht, Kryesia e PVD-së rikonfirmon përkrahjen për Platformën politike të shqiptarëve të Luginës së Preshevës, të aprovuar nga Kuvendi i këshilltarëve shqiptarë të Preshevës, Bujanocit dhe Medvegjës, me anë të cilës janë mbështetur parimet e Grupit të Kontaktit si dhe vet Pakoja e Ahtisaarit për statusin e Kosovës.

            Duke i trajtuar të papranueshme dhe të rrezikshme paralajmërimet për pazarllëqe lidhur me ndarjet në baza etnike, Kryesia e PVD-së angazhohet edhe më tutje për realizimin e të drejtave politike, ekonomike, sociale dhe kulturore të shqiptarëve në Luginë të Preshevës me të njejtat parime dhe kritere me të cilat serbët do t’i realizojnë të drejat e tyre në Kosovë në bazë të pakos së Ahtisaarit.

 Kryesia e PVD-së

 Riza HALIMI, Kryetar