Lëvizja e Progresit Demokratik
Rr. e Kosovës, nr.54
17520 Bujanoc
Data:26.12.2008

Bastisje me motive politike

Lëvizja e Progresit Demokratik, me seli në Bujanoc, reagon ashpër ndaj bastisjeve masive të policisë dhe xhandarmërisë e cila që nga orët e hershme të mëngjesit të së premtes së 26 dhjetorit 2008, ka ndërmarrë një aksion kinse në emër të urdhrit të Gjyqit për Krime lufte, për arrestimin e grupi të Gjilanit ish pjesëtarë të UCK-së, të cilët sipas tyre paskan kryer vepra krimi kundër civilëve serbë dhe joshqiptarë në rajonin e Gjilanit, gjatë vitit 1999.
Beogradit zyrtar iu paska dashur të pres gati 10 vjet për të marrë një aksion të tillë për arrestimin e 10 personave dhe ndjekjen e të tjerëve edhe atë pikërisht në prag të festave të motmotit dhe në momentin kur në mënyrë publike ka plasur sherri në Qeverinë e Serbisë, e cila po e bart problemin në Luginë të Preshevës.
Është absurde dhe e pakuptimtë se si një bastisje politike vjen në këto momente, kur para pak ditësh në Bujanoc, Ministri i Mbrojtje Shutanovac tha në prag të këtij fundviti se edhe pas pavarësisë së Kosovës, nuk ka pasur incidente në Luginë të Preshevës.
Gjithashtu, është jo reale dhe jonormale të kërkosh ndriçim e rasteve në territorin e Gjilanit e t’i heshtësh rastet e civilëve të pafajshëm shqiptarë të Luginës së Preshevës, të cilët kanë rënë viktimë në të njëjtën periudhë kohore të konflikteve të armatosura.
Ndërtimi i bazës ushtarake në Cepotin të Bujanocit dhe stërngarkimi i forcave të kombinuara serbe në Luginë, të japin me kuptuar se kjo aferë politike është e vonshme dhe provokative, një nga më të rëndat që nga përfundimi i luftës të vitit 2001.
LPD kërkon nga faktorët vendorë dhe ndërkombëtarë t’i japin fund kësaj afere dhe të mos ngriten tensionet në Luginë, së cilës edhe ashtu akoma nuk iu janë shëruar plagët e luftës.



NGA SHËRBIMI PËR INFORMIM I LPD-së