Lëvizja e Progresit Demokratik
Rr. e Kosovës, nr.54
17520 Bujanoc
Data: 28.06.2009

NË VEND TË KUMTESËS: REAGIM

Lëvizja e Progresit Demokratik, vendimin e Gjykatës Supreme për Krime Lufte në Beograd e cila ka ngritur aktakuzë kundër 17 ish-pjesëtarëve të UÇK-së, të cilët akuzohen për krime lufte kundër civilëve në Gjilan në vitin 1999, e vlerëson të motivuar politikisht dhe një provokim ndaj gjendjes edhe ashtu jostabile në rajonin e Luginës së Preshevës.
LPD me shqetësim është duke i përcjellë këto procese të montuara, të cilat nuk i kontribuojnë paqes dhe stabilitetit në këtë rajon, por përkundrazi ngjallin frikë dhe pasiguri te shqiptarët, të cilët vazhdimisht kanë kërkuar që të zbardhen krimet e dhunës serbe ndaj qytetarëve shqiptarë në Luginë.
Arrestimet spektakulare dhe mbajtja në paraburgim për më shumë se gjashtë muaj të nëntë të rinjve nga Presheva, kanë shkaktuar mllef dhe hidhërim te shqiptarët e rajonit të Luginës së Preshevës. Për fat të keq Beogradi nuk i respekton as vendimet e veta, siç është rasti me shpalljen e amnestisë ndaj ish ushtarëve të UÇPMB-së, të aprovuar nga Kuvendi i Serbisë.
Është e papranueshme që pas gjashtë muajve paraburgimi, të ngritet aktakuza, e cila na kujtojnë metodat e përdoruara nga ish regjimi i Millosheviqit. Veprimet e gjertanishme si dhe në rastin ndaj të ashtuquajturit “Grupi i Gjilani”, qartë tregon se Gjykata Supreme vepron nën ndikimin dhe diktatin politik të Beogradit zyrtar. Shihet qartë se të gjitha këto bëhen me qëllim të nxitjes së shpërnguljes së të rinjve nga Lugina.
LPD, kërkon nga organet shtetërore t’i zbardhin të gjitha vrasjet që kanë ndodhur në Luginën e Preshevës në dekadën e fundit. Nga faktorët ndërkombëtarë kërkojmë që të ndikojnë te gjykatat serbe që të jenë të paanshme dhe të kundërshtoj proceset e montuara politike.
Në të mirë të stabilitetit të rajonit autoritetet e Beogradit duhet të heqin dorë nga këto procese të montuara dhe LPD kërkon që pa kurrfarë kushti të lirohen të akuzuarit.


NGA KRYESIA E LPD-së
Jonuz Musliu – kryetar
_________________