Në prag të pavarësimit të Kosovës

Për festë, por pa eufori

Shkruan: Shaip Kamberi

Miratimi i vendimit për pavarësinë e Kosovës, të cilin do ta bëjë këtë fundjavë Kuvendi i Kosovës do të shënohet me gjasë me dinjitet në të gjitha trojet shqiptare. Sigurisht që edhe Lugina e Preshevës - sikur pjesa aktualisht më e rrezikuar e etnikumit shqiptar - do ta shënojë këtë akt duke iu bashkëngjitur kësisoji festës gjithëkombëtare lidhur me jetësimin e zyrtarizimit të mëvetësisë së Kosovës. Mirëpo për dallim nga trojet e tjera ku jetojnë shqiptarët; Presheva, Bujanoci dhe Medvegja do ta shënojnë pavarësinë e Kosovës jo vetëm nën vëzhgimin e forcave serbe të sigurisë, por edhe nën presionin e retorikës agresive të politikës dominuese serbe, e cila po rishfaqet gradualisht në opinionin publik vendës.

Ditë më parë, nën udhëheqjen e kryeministrit Koshtunica, qeveria serbe ka marrë vendim për ta “shpallur të pavlefshëm çdo vendim të institucioneve të përkohshme të Kosovës lidhur me pavarësinë e saj”. Në dokumentin e miratuar nënvizohet në mënyrë kërcënuese se “Qeveria është e gatshme që ta zbatojë kushtetutën dhe ligjet e Serbisë në territorin e KA të Kosovës”, mbase duke kërcënuar se organet kompetente shtetërore do të jenë të gatshme që të “ndërmarrin të gjitha veprimet ligjore dhe kushtetuese me të cilat garantohet pacënueshmëria e territorit të Serbisë”.

Duke e marrë parasysh forcën (jo)reale të Serbisë për ta sfiduar bashkësinë ndërkombëtare, nuk ka dilemë se këto qëndrime shantazuese janë më tepër të orientuara për konsum të brendshëm politik. Megjithatë kjo nuk nënkupton se Lugina e Preshevës – ku është vërejtur së fundi edhe shtimi i forcave të sigurisë serbe – është e imunizuar nga kërcënimet dhe nga veprimet e mundshme të drejtpërdrejta të strukturave të caktuara serbe, të cilat në vazhdimësi shquhen për bindje anti-shqiptare. Aq më shumë kur dihet se nëpër tërë territorin e Serbisë janë rishfaqur shoqatat e ndryshme me ideologji fashiste, të cilat kamuflohen nën petkun e “shoqërisë civile”.

Dhe së fundi, edhe Ministri serb i Mbrojtjes Dragan Shutanovaci dhe shefi i Shtatmadhorisë së armatës serbe, Zdravko Ponoshi nuk kanë nguruar që të rishpikin se në Luginën e Preshevës “ka grupe te vogla, të cilat do të mund që ta rrezikonin sigurinë”. Pohime që janë gjithsesi në kundërshtim me raportin e policisë lokale, të botuar vetëm një muaj më parë, i cili konstatonte se “në rajon nuk ka kurrfarë informacione për ekzistimin e çfarëdo grupi i cili do të mund që ta rrezikonte sigurinë”.

Në kushtet e një shqiptarofobie në rritje e sipër në Serbi, deklaratat e këtilla të zyrtarëve më të lartë shtetëror mund vetëm që ta përkeqësojnë gjendjen mbretëruese dhe që të shërbejnë sikur pretekst për t’i legjitimuar veprimet e mundshme policoro-ushtarake kundër popullatës lokale shqiptare në emër të luftës kundër grupeve fantome.

Krahas mundësisë së rreziqeve të tilla, shqiptarët vendorë nuk kanë asnjë arsye që të mos e shënojnë shtetëzimin e Kosovës derisa ai të manifestohet me dinjitet dhe me veprime racionale. Në këtë kuptim dhe në këto rrethana, nuk ka asnjë arsye për sjellje euforike, e cila do të mund që të instrumentalizohej për ekspedita eventuale të dhunshme nga ata të cilët me vite të tëra po dëshmojnë se nuk po arrijnë që ta promovojnë të ndryshmen nga trashëgimia e së kaluarës së tyre të errët.

(Autori është nënkryetar i Partisë për Veprim Demokratik)