Press

"Na mungon klasa politike, na mungon shembulli i ndëshkimit"

Modernizimin sintetik të demokracisë në Shqipëri nuk e bën populli, por klasa politike e tij.
Populli me fuqinë e tij të jep votën, të jep pushtetin politik dhe kjo klasë duhet të end demokracinë sipas modeleve më të mira europiane e më tej. Problemi çalon pikërisht tek politikani shqiptar, tek nëpunësi, tek diplomati e më tej.
Ne na mungon klasa e vërtetë politike.


Është e vërtetë që partitë politike në Shqipëri (dhe jo pak) janë regjistruar në gjykatë si të tilla, por asnjëra prej tyre nuk është në nivelin e përmbushjes së detyrës madhore përballë popullit. Të shëmbëllejnë ndonjëherë si disa organizata kriminale.


Kur janë reformuar partitë?! Kur janë distancuar ato nga krimi dhe korrupsioni? Pse këta elementë nuk jetojnë mes popullit?! Po populli këta nuk i njeh?! Sigurisht, por janë të lodhur dhe thotë: "Derrat një turi kanë!".


Pra, reformimi në tërësi i sistemit fillon nga ky ndryshku politik. Largimi ose përjashtimi i të gjithë elementeve të korruptuar kriminal që shpeshherë sponsorizojnë këto parti për të ardhur në pushtet. Flet historia njëzetvjeçare.


Asnjë parti, në bazë të fakteve dhe provave nuk ka demaskuar një politikan të vetin. Jo për hakmarrje, por si të padenjë për sistemin demokratik dhe shtetin. Kjo nuk është luftë klasash, por mbrojtja e institucioneve. Në të kundërt partitë janë bërë strehë e korrupsionit dhe krimit.


Të fillojë ky operacion real, sepse ka ndodhur që janë formuar parti të reja (kupto edhe LSI) për të forcuar terrenin e tyre ekonomik e mafioz në kurriz të demokracisë shqiptare. Dhjetëra parti të vogla fantazma për të mbajtur gjallë celula korrupsioni dhe bërë aleanca majtas a djathtas, sipas pazareve të fshehta korruptive. Nëse vazhdohet kështu, ky brez që po rritet më shumë do ta shtjerë mallkimin mbi moralin tonë.


Gazeta Shekulli