Këshilli Nacional shqiptar do të themelohet jashtë dispozitave ligjore, paralajmëron “Beta”

Preshevë, 27 janar (presheva.com) – Një burim nga grupi i cili po punon në shqyrtimin e modaliteteve për themelimin e Këshillit Nacional të shqiptarëve të Luginës së Preshevës i ka thënë të enjten agjencisë “Beta” se vendimi definitiv rreth karakterit legjislativ dhe përbërjes së Këshillit Nacional do të merret javën e ardhshme në mbledhjen e përbashkët të këshilltarëve shqiptarë të komunave të Preshevës, Bujanocit dhe Medvegjës. Ky burim ka pohuar se sipas të gjitha gjasave, Këshilli Nacional nuk do të formohet sipas dispozitave të ligjit të SMZ. Grupi i punës i katër përfaqësuesëve të subjekteve politike shqiptare për harmonizimin e qëndrimeve për themelimin e Këshillit Nacional të shqiptarëve të Luginës së Preshevës u takua sërish të enjten në Preshevë. Sipas agjencisë “Beta”, Partia për Veprim Demokratik (PVD) e Riza Halimit angazhohet për formimin e Këshillit Nacional në harmoni me Ligjin mbi Mbrojtjen e të Drejtave dhe Lirive të Minoriteteve në SMZ, ndërsa Lëvizja për Progres Demokratik (LPD), Partia Demokratike Shqiptare (PDSH) dhe Bashkimi Demokratik i Luginës (BDL) për formimin e Këshillit jashtë ligjit. Ministri për të Drejtat e Njeriut e të Minoriteteve i Unionit serbomalazez, Rasim Lajiq i ka thënë kësaj agjencie se dymbëdhjetë pakica kombëtare i kanë formuar Këshillat e tyre Nacionale sipas ligjit dhe se “nuk mund të kemi ligje që vlejnë për të tjerët apo ndonjë ligj të veçantë vetëm për shqiptarët”. “As shteti e as përfaqësuesit e bashkësisë ndërkombëtare dhe të OSBE-së nuk do ta pranojnë ndonjë Këshill të veçantë shqiptar”, ka thënë Lajiqi.