Këshilli Nacional i Shqiptarëve të Luginës, i nevojshëm në kohën e përcaktimit të statusit të Kosovës

Iniciativa për formimin e Këshillit Kombëtarë të Shqiptarëve të Luginës së Preshevës, edhe tani, tri vite pas inicimit, ka mbetur vetëm një ide. Përfaqësuesit e subjekteve politike në këtë rajon, e kanë të qartë se formimi i Këshillit Nacional është vonuar...

Preshevë, 24 shtator (presheva.com) - Kryetari i Partisë për Veprim Demokratik, Riza Halimi, ka shfaqur bindjet e tij për arritjen e kompromisit me oponentët e tij politik të cilët veprojnë në Luginë për formimin e Këshillit Nacional. Ai ka theksuar se formimi i Këshillit Kombëtar ndonëse i vonuar tani është më se i nevojshëm. Nga ana tjetër, Nazmi Arifi, përfaqësues i Partisë Demokratike Shqiptare, mosthemelimin e Këshillit Nacional e ka quajtur të vonuar dhe rezultat të divergjencave partiake. Ai ka ftuar subjektet tjerat politike që në mënyrë sa më të shpjetë të formojnë këtë institucion, përmes së cilit shqiptarët e këtushëm do të flisnin me një gjuhë. Në prag të bisedimeve për statusin e Kosovës, Këshilli Nacional për shqiptarët e Luginës është më se i domosdoshëm, ka deklaruar Nazmi Arifi përfaqësues i Partisë Demokratike Shqiptare. Skender Destani i Bashkimit Demokratik të Luginës,duke sqaruar rëndësinë e Këshillit Nacional, ka kërkuar që të inkuadrohen edhe qytetarët të cilët nuk janë të angazhuar politikisht. Destani është kundër Këshillit Kombëtar,në të cilin do të përfshiheshin vetëm subjektet politike që veprojnë në këtë rajon. Ndërkohë, Orhan Rexhepi, udhëheqës i Lëvizjes së Progresit Demokratik në Preshevë, ka akuzuar Ministrin për të Drejtat e Neriut dhe Minoritete dhe njëkohësisht kryetarin e Trupit Koordinues Qeveritar, Rasim Laiqin ,Prefektin e Preshevës Riza Halimin dhe ish-kryetarin e Trupit Koordinues Qeveritar Nebojsha Çoviqin, të kenë penguar formimin e Këshillit Kombëtar të shqiptarëve të Luginës së Preshevës. Rexhepi, formimin e këtij institucioni e ka quajtur kërkesë të Rasim Laiqit, tani kur Lëvizja e Progresit Demokratik në Kuvendin Komunal të Preshevës e ka inicuar idenë për shpalljen e Statusit Special të Luginës, ka përfunduar Rexhepi. Është pritur që përmes Këshillit Nacional, shqiptarët e Luginës së Preshevës do të mund të tejkalonin shumë probleme, të cilat nuk gjejnë zgjidhje në administratat komunale. Formimi i këtij institucioni vlerësohet të jetë ndër çështjet politike më prioritare.

(RTK)