Lajiqi kërkon nga politikanët shqiptarë që ta formojnë Këshillin Nacional

Bujanoc, 18 gusht (presheva.com) - Ministri për të Drejtat e Njeriut dhe të Minoriteteve i SMZ - së, Rasim Lajiqi ka shfaqur bindjen se nuk do të ketë vatër të re të konflikteve në jugun e Serbisë. “Nuk do të ketë kurrfarë vatre të konflikteve në jugun e Serbisë dhe ne presim normalizimin e gjendjes”, ka thënë ai të enjten gjatë një konferencë për gazetarë në Bujanoc. Lajiqi, i cili është gjithashtu nënkryetar i Trupit Koordinues për jugun e Serbisë i ka ftuar shqiptarët që ta formojnë Këshillin Nacional, « në mënyrë që të mund t’i zgjidhin problemet e veta në kuadër të institucioneve të shtetit ». Ai ka rikujtuar se bashkësia shqiptare është pakica e vetme kombëtare në Serbi, e cila nuk e ka formuar ende Këshillin Kombëtar. Sipas tij, procesi i integrimit të bashkësisë shqiptare në jetën shtetërore, politike dhe shoqërore të vendit është i domosdoshëm , « sepse nuk ka më arsye për bojkotimin e zgjedhjeve, pasi që është hequr censuzi për partitë e pakicave kombëtare ». « Bashkësia etnike shqiptare, si edhe pakicat tjera kombëtare mund t’i kenë në të ardhmen përfaqësuesit e tyre legjitim në Kuvendin e Serbisë », ka shtuar ai. Rasim Lajiqi, së bashku me përfaqësuesin e ambasadës së SHBA-ve në Beograd të ngarkuar për marrëdhënie me mediat, Alen Doukal e kanë shënuar fillimin e punës të disa projekteve, të cilat i kanë financuar Serbia dhe SHBA-të në komunën e Bujanocit.