Partitë politike shqiptare nuk arrijnë që të pajtohen lidhur me themelimin e Këshillit Nacional

Preshevë, 30 janar (presheva.com) – Përfaqësuesit e partive politike shqiptare të Luginës së Preshevës nuk kanë arritur që të pajtohen lidhur me themelimin e  Këshillit Nacional shqiptar, ka mësuar “presheva.com”.  Subjektet politike kanë pasur divergjenca lidhur me atë se a duhet që të formohet Këshilli Nacional në harmoni me Ligjin mbi Minoritetet të Serbisë dhe Malit të Zi apo me ndonjë formë tjetër. Partia për Veprim Demokratik (PVD) e Riza Halimit dhe Bashkimi Demokratik i Luginës (BDL) e Skender Destanit kanë favorizuar formimin e Këshillit në harmoni me ligjin, ndërsa Partia Demokratike Shqiptare (PDSH) e Ragmi Mustafës dhe Lëvizja për Progres Demokratik (LPD) e Jonuz Musliut kanë kundërshtuar një koncept të këtillë. Ragmi Mustafa i ka thënë agjencisë “Beta” se partia e tij është për formimin e Këshillit i cili do të ishte organ i mirëfilltë i shqiptarëve të Luginës së Preshevës, e jo një trup në shërbim të marketingut të Ministrisë për të Drejtat e Njeriut dhe të Minoriteteve të SMZ. Siç ka mësuar “presheva.com” drejtuesit e partive politike shqiptare të Luginës së Preshevës do të takohen sërish gjatë javës së ardhshme për të tentuar që t’i harmonizojnë qëndrimet e tyre.