Rexhepi: Zyrtarët më të lartë të Serbisë janë përgjegjës që nuk është formuar ende Këshilli Nacional i shqiptarëve

Preshevë, 1 korrik (presheva.com) - Lideri i Lëvizjes për Progres Demokratik në Preshevë, Orhan Rexhepi i ka akuzuar zyrtarët më të lartë të Serbisë se janë përgjegjës që nuk është formuar ende Këshilli Nacional i shqiptarëve.

- S’ka dilemë se e tërë fajësia është në autoritet serbe. Pikërisht ai pushtet me hapat e ndërmarra rreth Trupit Koordinues ka arritur ta prishin bazën për formimin e Këshillit Nacional, kuptohet me ndihmën e politikanëve naiv nga Lugina - ka thënë ai për agjencinë “Beta”. Udhëheqësi lokal i kësaj partie, i cili ndryshe nga kryetari i tij nuk ka hyrë në Trupin Koordinues është angazhuar për status të veçantë për tri komunat duke vlerësuar se Trupi Kooordinues nuk mund t’i zgjidh problemet e shqiptarëve të atjeshëm.

Kryetari i Partisë për Veprim Demokratik, Riza Halimi, Kryetari i Lëvizjes së Progresit Demokratik, Jonuz Musliu dhe Kryetari i Bashkimit Demokratik të Luginës, Skender Destani kanë nënshkruar marrëveshjen për t’u kyçur në Trupin Koordinues për Preshevë, Bujanoc dhe Medvegjë, ka njoftuar agjencia « Beta ». Kryetari i Partisë Demokratike Shqiptare, Ragmi Mustafa është i vetmi nga liderët shqiptarë të Luginës së Preshevës i cili nuk ka pranuar që ta nënshkruajë marrëveshjen përkatëse. Marrëveshjen e patën nënshkruar po ashtu edhe Nagip Arifi, në cilësinë e kryetarit të komunës së Bujanocit, Sllobodan Drashkoviqi, si kryetar i komunës së Medvegjës dhe Nebojsha Çoviqi, si kryetar i Trupit Koordinues.

Pas vrasjës së të miturit shqiptar - Dashnim Hajrullahu - nga ana e ushtrisë serbo-malazeze në zonën kufitare Maqedoni-SMZ, Qeveria e Serbisë u ka ofruar shqiptarëve të Luginës së Preshevës që të përfshihen në Trupin Koordinues për Preshevë, Bujanoc dhe Medvegjë. Trupi Koordinues është themeluar më 16 dhjetor të vitit 2000, në kohën e konfliktit të armatosur në mes forcave serbe të sigurisë dhe pjesëtarëve të Ushtrisë Çlirimtare për Preshevë, Medvegjë dhe Bujanoc. Në përbërjen e ngushtë të Trupit Koordinues, e cila numëron tetë anëtarë janë përfshirë dy përfaqësues nga forcat e sigurisë serbe, njëri nga Ministria e Policisë (MUP) dhe tjetri nga Ministria e Mbrojtjes. Qeveria e Serbisë ka emëruar së fundi për kryetar të Trupit Koordinues: Nebojsha Çoviqin, ndërsa për nënkryetar janë zgjedhur: Rasim Lajiqi, Ninoslav Kërstiqi dhe Milisav Markoviqi. Tri vendet të tjera të nënkryetarëve janë rezervuar për kryetarët e Komunave të Preshevës, Bujanocit dhe Medvegjës. Në përbërjen e zgjeruar të Trupit Koordinues janë paraparë që të kyçen kryetarët e Kuvendeve Komunale dhe zëvëndësit e tyre. Programi i ri i Trupit Koordinues, i cili është miratuar në Qeverinë e Serbisë parashihet që të realizohet deri në vitin 2007

Dosja: Shqiptarët dhe Trupi Koordinues?