Surroi: Kosova do të jetë avokat i interesave të shqiptarëve të Luginës së Preshevës

Prishtinë, 16 dhjetor (presheva.com) - Kryesuesi i Këshilli Konsultativ për Minoritetet në kuadër të Grupit Negociator të Kosovës, Veton Surroi ka thënë se Kosova do të jetë avokat i interesave të shqiptarëve të Luginës së Preshevës.
Ai e ka deklaruar këtë pas takimit me liderët e Luginës së Preshevës, i cili u mbajt në kuadër të përgatitjeve për bisedimet për statusin e Kosovës. Nga ana e tij, kryetari i Kuvendit Komunal të Preshevës, Ragmi Mustafa ka rikonfirmuar se shqiptarët e Luginës së Preshevës do të hartojnë së shpejti një platformë të përbashkët e cila do t’i dorëzohet Grupit Negociator të Kosovës. Derisa në emër të Kosovës ishin të pranishëm dy zyrtarë politikë, delegacioni i Luginës së Preshevës përbëhej nga rreth dhjetë zyrtarë politikë dhe institucionalë.