Këshilltari i Koshtunicës pohon se shqiptarët e jugut të Serbisë po e hapin “kutinë e pandorës”

Beograd, 9 janar (presheva.com) – Këshilltari i Kryeministrit të Serbisë për çështje politike, Aleksandar Simiqi ka deklaruar se nëpërmjet kërkesës për të marrë pjesë në grupin negociues të Kosovës, shqiptarët e jugut të Serbisë po e hapin “kutinë e pandorës”. “Ata nuk e kanë kuptuar se cila është natyra e bisedimeve të cilën e kanë përcaktuar Kombet e Bashkuara”, ka thënë ai të hënën për “B92”. Sipas Simiqit, detyrat e Marti Ahtisarit sikur ndërmjetësues i këtyre bisedimeve janë bisedimet politike rreth statusit të Kosovës dhe jo zgjidhja e çështjes kombëtare shqiptare në Ballkan. “Nëse dëshirohet që kjo të ndodh, frikësohem se po e hapim kutinë e Pandorës me pasoja të paparashikueshme. Çështja e pozitës së bashkësisë shqiptare në Preshevë dhe Bujanoc është zgjidhur me marrëveshjen e vitit 2001, nëpërmjet së cilës është ndërprerë kryengritja e armatosur shqiptare ndaj forcave të sigurisë të Serbisë dhe Jugosllavisë”, ka përfunduar Këshilltari i Kryeministrit të Serbisë.