Lajiqi: Shqiptarët e jugut të Serbisë dëshirojnë ta ndërkombëtarizojnë çështjen e tyre duke e ndërlidhur me Kosovën

Beograd, 9 janar (presheva.com) – Ministri për të drejtat e njeriut dhe për minoritetet në Serbi dhe Mal të zi, njëherësh edhe kryetar i Trupit Koordinues për Preshevë, Bujanoc dhe Medvegjë; Rasim Lajiqi ka deklaruar se shqiptarët e jugut të Serbisë dëshirojnë që ta ndërkombëtarizojnë dhe tërheqin vëmendjen për çështjen e jugut të Serbisë duke e ndërlidhur me Kosovën. “Shihet qartë radikalizimi i kërkesave të tyre gjatë viteve të fundit”, ka thënë ai të hënën për “B92” duke shtuar se ambasadorët e SHBA-ve dhe Gjermanisë, Majkëll Pollt dhe Andres Cobel; si dhe ish-shefi i OSBE-së Mauricio Mesari e kanë bërë të qartë se nuk mund të bëhet fjalë për përfshirjen e shqiptarëve të Preshevës, Bujanocit dhe Medvegjës në grupin negociues të Prishtinës. “Problemi i shqiptarëve të jugut të Serbisë do të zgjidhet nëpërmjet procesit të demokratizimit të Serbisë dhe forcimit të pushtetit lokal, gjë që nënkupton pjesëmarrjen e tyre në të gjitha organet e pushtetit, veçmas në gjyqtari dhe polici”, ka pohuar Rasim Lajiqi.