Ndryshohen disa pika të verzionit të parë të platformës politike, e cila do të miratohet më 14 janar

Preshevë, 7 janar (presheva.com) – Përfaqësuesit e partive politike shqiptare të Luginës së Preshevës janë pajtuar për të ndryshuar disa pika të platformës së tyre politike, ka bërë të ditur të shtunën agjencia “FoNet”. “Disa pika të platformës politike janë ndryshuar nga verzioni i parë i paraqitur para dy javëve, megjithëse thelbi ka mbetur i njëjtë” , ka mësuar “FoNet”-i nga burimet shqiptare. Verzioni i ri i deklaratës është “modern, por e ruan thelbësisht kërkesën për autonomi politiko-territoriale të shqiptarëve të Luginës së Preshevës në kuadër të Serbisë, nëse kufijtë e saj nuk ndryshohen”. Seanca e përbashkët e të gjithë këshilltarëve komunalë shqiptarë të Preshevës, Bujanocit dhe Medvegjës do të mbahet më 14 janar në Preshevë, ku do të miratohet platforma politike dhe ku do të formohet Këshilli Nacional i shqiptarëve të jugut të Serbisë, ka njoftuar gjithashtu agjencia “Beta”.