PVD-ja favorizon Këshill Nacional në pajtim me ligjin, por e gatshme të pranojë edhe formën jashtinstitucionale

Preshevë, 19 janar (presheva.com) - Në prag të mbajtjes së seancës së këshilltarëve të Kuvendeve Komunale të Preshevës, Bujanocit dhe Medvegjës, të shtunën më 21 janar, në Bujanoc, rreth themelimit të Këshillit Nacional të shqiptarëve të këtij rajoni, Kryesia e PVD-së në Preshevë, përmes një kumtese për opinion bën të qartë edhe një herë qëndrimin e vet lidhur me themelimin e  këtij organi të rëndësishëm për shqiptarët e Luginës. Me këtë rast, kryesia e PVD-së  e «vlerëson të rëndësishëm tubimin e këshilltarëve shqiptarë të këtij rajoni të shtunën e kaluar me ç'rast është aprovuar Platfoma Poliike». Megjiithatë, me këtë rast PVD shpreh «keqardhje pse në këtë moment të rëndësishëm nuk është nisur iniciativa për  themelimin e Këshillit Nacional». «Edhe pse me këtë rast nuk  u dëgjuan qëndrimet e mëparshme të PDSH-së se nuk e pranon ligjin e Lajiqit, megjithatë këshilltarët e kësaj partire refuzuan të bëjnë deklarimin për Këshill Nacional institucional apo jashtë tij», thuhet në kumtesën e PVD-së. Me këtë rast, PVD-ja e rikonfirmon qëndrimin e vet që «njësoj si hungarezët e Vojvodinës, boshnjakët e Sanxhakut edhe shqipëtarët e këtij rajoni ta themelojnë Këshillin Nacional në bazë të Ligjit aktual i cili ka marrë notë pozitive edhe nga Këshilli i Evropës, njësoj siç janë duke marrë pjesë në strukturat e Këshilit nacional». Kryesia e PVD-së edhe më tutje mendon se «derisa nuk sigurohen zgjedhje të drejtpërdrejta, forma më e mirë për themelimin e Këshillit është ajo përmes  Kuvendit të elektorëve, në të cilin pos 66 këshilltarëve shqiptarë mund të marrin pjesë edhe qytetarët shqiptarë të këtij rajoni që arrijnë të sigurojnë përkrahjen e 100 nënshkrimeve, por edhe përfaqësuesi i OJQ-së e cila është regjistruar para vitit 2001». Më tej PVD-ja konsideron se «Meqë Këshilli Nacional në bazë të ligjit aktual  ka fushëveprimin e kufizuar në sferën e arsimit, kulturës, informimit aplikimit zyrtar të gjuhës dhe shkrimit si dhe simboleve kombëtare, për çështjet e tjera politike, legjitimition më të lartë e kanë këshilltarët shqiptarë  si organ përfaqësues i shqiptarëve të këtij rajoni». « Për hirë të unitetit  që në këto momente është më se i domosdoshëm, Kryesia e PVD-së do të pranojë edhe opcionin jashtinstitucional të themelimit të Këshillit nëse për këtë deklarohet shumica e këshilltarëve. Nënkuptohet, në  atë rast është e domosdoshme  që subjektet politike shqiptare të kalojnë në veprime jashtinstitucionale edhe në fushat e tjera, e në radhë të parë në organizimin e pushtetit lokal », thuhet në kumtesën e nënshkruar nga Riza Halimi, kryetar i PVD-së.