R E A G I M

"Nuk na duhet formimi i Këshillit Nacional nën ombrellën e Serbisë"

Krijimi i Këshillit Nacional (kombëtar) shqiptar për Kosovës Lindore sipas rregullores dhe planit të Serbisë për pakica kombëtare, për SHSHKL “Vatra” është i papranueshëm për shumë arsye:

-Kosova Lindore (Preshevë, Bujanoc dhe Medvegjë) është pjesë e Kosovës e ndarë padrejtësisht, pa vullnetin e popullit.

-Vazhdimisht janë burgosur dhe ndjekur veprimtarë të shumtë e një gjë e tillë vazhdon edhe sot.

-Mos zhvillimi ekonomik.

-Pengesat e shumta në zhvillimin e vlerave kulturore shqiptare.

-Marrja e së drejtës për deklarim të lirë dhe në formë demokratike e Statusit Politik të Kosovës Lindore si rajon i populluar me shumicë shqiptare dhe autokton në pronat e veta etj.

Këshilli Nacional i banorëve shqiptarë të Kosovës Lindore nuk mund të barazohet me atë të pakicave tjera etnike që jetojnë në Serbi si dhe të pakicave serbe që jetojnë në Kosovë, sepse shqiptarët e Kosovës Lindore janë autoktonë në trojet e veta, vendbanimet e tyre pothuajse janë etnike dhe të lidhura gjeografikisht me Kosovën, ndërsa serbët janë sjellë si kolonë gjatë periudhave të ndryshme të historisë me qëllime politike. Pra, shqiptarët nuk mund të barazohen assesi me etnitetin serb pasi dihet botërisht se si janë sjellë dhe kur janë sjellë. Sa për ilustrim vlen të përmendet se vetëm brenda viteve 1918-1941 në viset shqiptare u ngritën rreth 1000 (njëmijë ) koloni sllave me 15000 familje, gjegjësisht me 75000 banorë.
Duke u bazuar në këto fakte e shumë të tjera të cilat dihen, u bëjmë thirrje institucioneve të pushtetit lokal të tri komunave të mos bien nën ndikimin e lojërave të kujtdo qoftë në mënyrë që të mos dëmtohet e ardhmja e vendit.
Formimi e Këshillit Nacional në kuadër të Serbisë pa përfshirjen e njerëzve të dëshmuar: atdhetarëve, intelektualëve, luftëtarëve, të burgosurve politikë dhe veprimtarëve të shumtë të cilët dhanë shumë për lirinë e Kosovës dhe tokave etnike, mendojmë se është gabim i rëndë. Me formimin e një këshilli të tillë ne nuk marrim përgjegjësi para popullit dhe të ardhshmes.
Historia për shqiptarët dhe të drejtat e tyre nuk fillon në vitin 2006 dhe nuk mbaron vetëm në vendimin e këshilltarëve të tri komunave të Kosovës Lindore, por historia jonë në këtë rajon është shekullore, e dhimbshme dhe e larë me gjakun e dëshmorëve të brezave të shumtë, prandaj që të mos na përsëritet historia e dhimbshme, sot është koha dhe momenti që të merren vendime të drejta, të arsyeshme, të qëndrueshme dhe afatgjata për Statusin e shqiptarëve të Kosovës Lindore. Ajo çka pretendohet të arrihet përmes këtij këshilli, padyshim se mund të arrihet përmes institucioneve komunale dhe këtë duhet ta kenë parasysh këshilltarët e tri komunave.

Gjilan, 19. 1. 2006
SHSHKL “VATRA”