Veton Surroi, anëtar i Grupit Negociues të Kosovës

“Nuk i shoh shqiptarët e Luginës së Preshevës si “piuna” të luftës politike”

Kryetari i Partisë Reformiste Ora, dhe anëtari i Grupit Negociator të Kosovës, Veton Surroi deklaroi të enjten pas mbledhjes së Rregullt të Kuvendit të Kosovës, se edhe shqiptarët e Luginës së Preshevës sikurse serbët në Kosovë do t’i gëzojnë të gjitha të
drejtat që u garantohen me ligje ndërkombëtare. Surroi, biri i ish-një ambasadori shqiptar i kohës së Titos dhe njër nga publicistët më të suksesshëm shqiptar, pas kyçjes në politikë, ka shprehur gatishmërinë që të jetë “avokat” i mbrojtjes së të
drejtave të pakicave, të serbëve të Kosovës dhe të shqiptarëve në Luginë të Preshevës. Ai në tri pyetje flet për të ardhmen e shqiptarëve në tri komunat e “Kosovës Lindore” që administrohen nga Serbia.

Intervistoi: Milaim Shefkiu

Shqiptarët e Luginës së Preshevës kanë nxjerrë një platformë politike ku kërkojnë më shumë të drejta. Ju jeni në një far mënyre edhe “avokat” i Luginës së Preshevës në Kosovë. Cili është komenti i juaj?
Surroi - Unë mendoj se çështja e të drejta të komuniteteve është çështje rajonale dhe jo vetëm e një vendi në veçanti dhe është mirë që të hyjmë në një konkurrencë pozitive për të drejtat komuniteteve. Kjo do të thotë që në do të duhet të angazhohemi për sa më
shumë të drejta të komuniteteve në mënyrë që kjo të jetë standardi i ri i të drejtave komuniteteve që duhet të aplikohet natyrisht edhe ne Luginën e Preshevës karshi komunitetit shqiptar atje.

A duhet të zgjidhet problemi i shqiptarëve në Preshevë në korrelacion me serbët kosovarë?
Surroi - Ne nuk mund të kushtëzojmë asnjë proces dhe nuk mund të kushtëzohet sepse kjo ka të bëjë me statusin e Kosovës, por është me rëndësi që më arritjen e standardit të mbërrimë edhe mundësinë që bashkësia ndërkombëtare të interesohet për rritjen e nivelit të të drejtave që kanë të bëjnë me shqiptarët në Luginë të Preshevës.

Në Vjenë, Rangjel Nojkiq që është deputete i Kuvendit të Kosovës po merr pjesë në kuadër të delegacionit të Serbisë. A duhet që edhe një preshevar të jetë me delegacioni e Kosovës në Vjenë?
Surroi - Ne nuk mund të bëjmë gjimnastikë të tillë. Duhet të jemi serioz edhe ndaj bashkësisë ndërkombëtare. Fakti që Beogradi po i keqpërdor serbët e Kosovës nuk duhet të jetë lehtësim që edhe në të fillojmë t’i keqpërdorim shqiptarët atje. Unë
personalisht nuk i shoh shqiptarët e Luginës së Preshevës si “piuna” apo ushtarë të vegjël të luftës politike, por besoj thellësisht në të drejtat e qytetarëve shqiptarë në Luginë të Preshevës dhe besoj thellësisht se statusi i ardhshëm i Kosovës së pavarur, njëkohësisht do të nënkuptoj obligimet që duhet të merr Kosova ndaj shqiptarëve të Luginës së Preshevës si minoritet.

(KosovaLive)