Liderët politikë shqiptarë të Luginës së Preshevës kundërshtojnë Tadiqin

Preshevë, 5 janar (presheva.com) - Deklarata e Presidentit të Serbisë Boris Tadiqit se nuk do të debatohet për komunat e Preshevës, Bujanocit dhe Medvegjës në negociatat e ardhshme mbi statusin e Kosovës kontribon për destabilizimin e rajonit, kanë vlerësuar të enjten për agjencinë “Beta”, përfaqësuesit e shqiptarëve në jug të Serbisë. Me rastin e vizitës së djeshme të bazave ushtarake në Zonën Tokësore të Serbisë (ZTS), Tadiqi ka vlerësuar se platforma e partive politike shqiptare nga jugu i Serbisë për autonomi politike dhe territoriale të atij rajoni “nuk mund të ketë kurrfarë serioziteti” sepse negociatat do të zhvillohen ekskluzivisht mbi statusin e ardhshëm të Kosovës. Politikanët shqiptarë nga jugu i Serbisë kanë paralajmëruar se së shpejti në Preshevë do ta mbajnë mbledhjen e këshilltarëve komunalë shqiptarë nga Presheva, Bujanoci dhe Medvegja në të cilën do ta harmonizojnë përfundimisht platformën politike të partive shqiptare nga jugu i Serbisë.