SHPËRNDAJE

Kafenetë dhe baret në kryeqytetin e Vietnamit kanë filluar “t’ia shohin hajrin” samitit të dytë midis presidentit amerikan Donald Trump dhe udhëheqësit të Koresë së Veriut, Kim Jong Un, i cili pritet të zhvillohet gjatë javës së ardhshme.
Duke shfrytëzuar këtë mundësi, shkruajnë mediat e huaja, përcjell Telegrafi, ato kanë dalë me ide kreative duke ofruar “pije koktej”, të cilave u kanë vendosur emra që kanë të bëjnë me dy liderët dhe dy vendet e tyre, SHBA-së dhe Koresë së Veriut.
“Një birrë u frymëzua nga rrjedhat e pasura të malit Paektu midis Koresë së Veriut dhe Kinës”, ka thënë Nguyen Thi Huong Anh, drejtues i një bari në Hanoi.
Ndryshe, bëhet fjalë për një emër që ndërlidhet me malin që është më i madhi në gadishullin Korean në rreth 2.750 metra dhe vendlindja zyrtare e udhëheqësit të vdekur të Koresë së Veriut, Kim Jong Il.
Trump dhe Kim do të takohen më 27-28 shkurt, duke ndjekur samitin e tyre të parë historik në Singapor në qershor, kur ata premtuan të punojnë drejt denuklearizimit të plotë të gadishullit Korean.
Por, jo vetëm kafenetë dhe baret. Nga ky samit presin të kenë përfitime dhe biznese tjera të këtij vendi.
Ndër tjerash, edhe një berber në Hanoi ofron qethje flokësh gratis, për këdo që dëshiron të kopjojë stilin e flokëve të Trump dhe Kim.