SHPËRNDAJE

Piloti i “Ethiopian Airlines” aeroplani i të cilit Boeing 737 Max 8 u rrëzua javën e kaluar me ç’rast humbën jetën 157 persona, kishte raportuar se po ka vështirësi në pilotimin e aeroplanit dhe kishte kërkuar të rikthehet në bazë, ka njoftuar drejtori ekzekutiv i aviokompanisë, Tevolde Gebre Marijam, raporton CNN.

“Dëgjohet qartë në audio incizim se si piloti bisedon me zyrtarët e kullës së trafikut ajror”, ka shtuar Marijam.

Vetëm gjatë gjashtë muajve të fundit janë rrëzuar dy aeroplanë të tipit Boeing 737 Max 8. E në aksidentin e fundit që ka ndodhur më 10 mars ku u rrëzua aeroplani i Etiopisë, kanë humbur jetën 157 persona, kurse në aksidentin e mëparshëm kishin humbur jetën 189 persona.

Gebre Marijam ka deklaruar për CNN, se të gjithë pilotët e Ethiopian Airlines” kanë kryer trajnime shtesë për fluturime të sigurta.

“Ngjashmëritë e dy aksidenteve ajrore janë të dukshme. Në të dy rastet bëhej fjalë për modelin e njëjtë të aeroplanit, dhe të dy aeroplanët kishin fluturuar vetëm pak minuta para se të rrëzoheshin. Ende nuk e dimë shkakun e aksidentit, kurse spekulimet nuk i bëjnë mirë askujt”, ka shtuar Marijam.

Pas hetimeve në vendin e rrëzimit të aeroplanit janë gjetur dy kuti të zeza, ku njëra ishte shkatërruar pjesërisht. Aksidenti kishte ndodhur vetëm gjashtë minuta pasi aeroplani ishte ngritur në ajër. Pasagjerët që humbën jetën vinin nga 35 vende të ndryshme të botës.