SHPËRNDAJE

Ministrja e Mbrojtjes e Shqipërisë Olta Xhaçka, e cila po qëndron për vizitë zyrtare në Maqedoninë e Veriut, ka realizuar takim me homologen e saj Radmilla Sheqerinska. Pas takimit Xhaçka dhe Sheqerinska kanë mbajtur konferencë për shtyp, në të cilën theksuan bashkëpunimin e shkëlqyer mes Maqedonisë dhe Shqipërisë.

Sheqerinska dhe Xhaçka shprehën falënderime të ndërsjella për mbështetjen që kanë shtetet për njëra tjetrën, “Jam e kënaqur që ndodhem në Maqedoni në këtë moment. Ju tanimë jeni vetëm një hap larg anëtarësimit në NATO. Me anëtarësimin tuaj në NATO, rajoni do të jetë më stabil dhe më i sigurt.

Mbështetja e Shqipërisë për Maqedoninë e Veriut, ka qenë prioritet strategjik në politikën tonë të jashtme. Arritja e marrëveshjes me Greqinë, por edhe Ligji për zyrtarizimin e gjuhës shqipe, janë hapa që kërkojnë guxim të madh”. “Unë jam e lumtur që faktori politik shqiptar ka pasur rol të rëndësishëm në këto hapa.

Besoj që këto zhvillime jo vetëm që kanë garantuar anëtarësimin e Maqedonisë, por edhe stabilitetin dhe sigurinë e rajonit. Kemi edhe shumë për të bërë dhe për të realizuar atë që është strategjik për të gjithë ne – anëtarësimi në BE”, tha ministrja shqiptare Xhaçka. Ndrësa ministrja e Maqedonisë Radmilla Sheqerinska, theksoi se Shqipëria çdo herë ka mbështetur Maqedoninë dhe se kjo mbështetje nuk do të harrohet. Të pyetura për qëndrimin e Serbisë për mosanëtarësim në NATO, ata thanë nuk dëshirojnë të ndërhyjnë në punët e brendshme të shteteve fqinje dhe se dëshirojnë që aspiratat euroatlantike t’i kenë të gjitha shtetet.