SHPËRNDAJE

Janë bërë një vit nga atëherë Qendra Universitare e Mjekësisë Ligjore e Lozanës nuk ka kthyer asnjë përgjigje.

Më 2 Qershor të 2018-tës ishte konfirmuar se ekspertiza që do zbardhte më shumë detaje rreth vdekjes së Astrit Deharit do të behej në Zvicrës.

E tash kur janë bërë një vit nga atëherë Qendra Universitare e Mjekësisë Ligjore e Lozanës nuk ka kthyer asnjë përgjigje.

Sipas avokatit të familjes Dehari, Tomë Gashi, gjithçka është në duart e Ministrisë së Drejtësisë dhe Prokurorit të Shtetit, dhe se kthimi i kësaj ekspertize duket të behet sa më shpejtë që e vërteta të zbardhet.

E këto dy institucione përkundër insistimit disa ditor të televizionit T7 nuk kanë treguar asgjë në lidhje me ekspertizën e bërë në Zvicër dhe nëse kanë komunikuar me autoritetet atje.

Kete i është dashur ta bëjë vetë avokati Tomë Gashi.

Megjithatë ai siç e ka përsëritur shpesh, ka bindjet e tij për rrethanat e vdekjes së ish aktivistit të Vetëvendosjes.

Ndërkohë, prokurori i rastit Metush Biraj, për T7 ka bërë të ditur se rezultatet janë duke i pritur.

Edhe për Birajn kjo stërzgjatje e këtij procesi është shqetësuese.

Astrit  Dehari ishte aktivist i Lëvizjes Vetëvendosje, u arrestua më 30 gusht të vitit 2016, i dyshuar se bashkë me aktivistë të tjerë sulmuan Kuvendin e Kosovës.

Ai vdiq më 5 nëntor të po të njëjtit vit, në Qendrën e Paraburgimit në Prizren, ku raporti i Institutit të Mjekësisë Ligjore rreth shkaqeve të vdekjes së Astrit Deharit më 18 nëntor 2016 doli në përfundim se Dehari ka bërë vetëvrasje, por rezultatet e këtij raporti nuk u pranuan nga prindërit e të ndjerit.

Në tetorin e vitit të kaluar Qeveria e Kosovës me kërkesë të ministrit të Drejtësisë, Abelard Tahiri ka ndarë mjetet financiare në shumën prej 50 mijë eurove për ekspertizë shtesë jashtë vendit në lidhje me vdekjen e Astrit Deharit.