SHPËRNDAJE

Që në fillim të vitit 2019 dhe në vazhdim, informacionet e strukturave të inteligjencës shqiptare kanë qenë në shënjestër të sulmeve kibernetike. Qindra emra përdoruesish dhe fjalëkalimesh janë komprometuar si rezultat i këtyre aktiviteteve të lidhura me spiunazhin kibernetik, pas të cilit duket se qëndron qeveria turke.

Shërbimi Informativ Shqiptar ka deklaruar se deri më tani hakerët nuk kanë prekur asnjë informacion të klasifikuar si sekret shtetëror apo të sigurisë së lartë.

Në një raport eksluziv, agjencia ndërkombëtare e lajmeve Reuters citon tre zyrtarë të lartë të sigurimit, dy britanikë dhe një amerikan të cilët konfirmojnë se hakerët kanë siguruar qasje të paligjshme në rrjet.

Sipas tyre ky aktivitet i spiunazhit kibernetik është i lidhur drejtpërdrejt me qeverinë turke dhe ka prekur më shumë se 30 organizata qeveritare, përfshirë ambasadat, ministritë dhe shërbimet e sigurisë greke, qipriote, irakiane, mes tyre edhe ato shqiptare. Në shënjestër kanë qenë edhe disa organizata të shoqërisë civile në Turqi, që besohet se kanë lidhje me klerikun Fethullah Gylen.

Ministria e Brendshme e Turqisë nuk pranoi të komentojë pretendimet, ndërsa një zyrtar i lartë tha se vetë Turqia ka qenë shpesh viktimë e sulmeve kibernetike.

Zyrtarët perëndimorë dhe ekspertët privatë të sigurisë në internet kanë identifikuar metodën e përdorur nga hakerët, e cila përfshinte rregullimin e librit të adresave efektive të internetit, të quajtur Domain Name System (DNS).

Ata kanë ngritur alarmin për shtimin e rasteve të spiunazhit kibernetik i cili cenon edhe sigurinë kombëtare.