SHPËRNDAJE

Kryetari i Këshillit Kombëtar të Nismës Socialdemokrate, njëherësh ish kryetari i Kuvendit të Kosovës, Jakup Krasniqi, ditë më parë ka njoftuar se është thirrur nga Gjykata Speciale për tu marrë në pyetje.

Krasniqi ka njoftuar publikisht se ka marrë ftesë nga Dhomat e Specializuara të Gjykatës Speciale në Hagë të paraqitet më 24 korrik 2019.

Ai nëpërmjet një postimi në llogarinë e tij në Facebook ka shprehur shqetësimin e tij përmes një poezie, të cilën e ka titulluar “Ikni ju, ne mos na ftoni”.

Postimi i plotë:

IKNI JU, NE MOS NA FTONI!

A thua kush do të ishim ne sot
Pa ato jetë të shumta kazamatesh
S’e di as si do të flisnin sot disa
Po të vazhdohej shikimi veç në hava!

A thua do të ishim këtu ku jemi
Pa të madhërueshmen tonë Çlirimtare
Ajo që na liroi nga vargonjtë e robërisë
Pa të jo kurrë s’do t’i gëzoheshim Lirisë…

A thua ç’gjuhë do të flitej këndejpari
Mohuesit e trimërisë jo s’e thonë kurrë
Ata i nënshtrohen çdo soji e çdo fare
Se jetën e bëjnë besa vetëm për pare!

A thua bastardët pyesin për politikë
Tek turrin e bëjnë vetëm për pasuri
Parazitë që jetojnë nën çdo robëri
Ashtu siç jetuan sa e sa nën Serbi!

Epo, atë rrugë s’ua ndalim dot
Të ikin sa më parë,madje që sot
Shqiptarët jo kurrë mos i ftoni
Ikni, kështu ju dua, mos hezitoni!

Në rrugën e tradhtisë mos na ftoni
Rrugën e Lirisë me Çlirimtaret
Për jetë të jetëve s’do ta ndryshonim
Ato gjurmë të Jetës në Ne janë mishëruar!

Ndërsa, të premtën kryeministri Ramush Haradinaj ka dhënë dorëheqje pasi Gjykata Speciale ka ftuar për intervistim. E nga specialja për intervistim është ftuar edhe Bisilm Zyrapin, këshilltar i presidentit Hashim Thaçi si dhe disa ish-eprorë tjerë të UÇK-së.