SHPËRNDAJE

Presidenti Stevo Pendarovski gjatë një konference për shtyp shpalli gjendjen e jashtëzakonshme në vend lidhur me pandeminë e Coronavirusit që ka kapluar edhe Maqedoninë ku deri sot janë infektuar 35 persona.

“Vendimi im vjen nga neni 125 nga Kushtetuta e Republikës së Maqedonisë. Gjendja e jashtëzakonshme do të zgjasë 30 ditë. Në fund të këtyre 30 ditëve Qeveria do të më njoftojë për hapat e marrë në këtë periudhë. Gjatë 30 ditëve Qeveria duhet t’i përdor të gjithë mjetet e duhura, përsëris të gjithë mjetet. Pres nga Qeveria dhe nga të gjithë institucionet e përfshira të jenë në krye të detyrës” tha Pendarovski.

Më herët edhe kryeministri teknik, Oliver Spasovski kërkoi shpalljen e gjendjes së jashtëzakonshme që do të mundësojë zbatimin e menjëhershëm të masave që do të luftojnë përhapjen e coronavirusit.

“Qeveria e Maqedonisë nuk ka dilemë, për këtë arsye në seancën e sotme do të propozojmë shpalljen e gjendjes së jashtëzakonshme, për të parandaluar përhapjen e coronavirusit. Kërcënimi nga përhapja masive, kërkon masa radikale”.

Edhe kreu i opozitës maqedonase, Hristijan Mickoski në konferencë për shtyp kërkoi nga Pendarovski që të shpallë gjendje të jashtëzakonshme për të mbrojtur shëndetin e qytetarëve dhe se pas kësaj shpallje, duhet të merren vendime për mbrojtjen e bizneseve dhe kompanive.

Përndryshe, kjo është herë e parë në historinë e vendit që shpallet gjendje e jashtëzakonshme. Kujtojmë se as gjatë konfliktit të vitit 2001 nuk ka pasur masa të këtij niveli