Sulmuesi i Chelseat, Nicolas Jackson, u desh të largohej ‘me forcë’ nga fusha nga bashkëlojtarët, për shkak të një përleshjeje që pati pas humbjes ndaj Evertonit në “Goodison Park”.
Golat nga Abdoluaye Doucoure dhe Lewis Dobbin i dhuruan fitoren vendasve duke thelluar edhe më tej krizën e rezultateve tek “Blutë e Londrës”.
22-vjeçari u pa tejet i nervozuar me disa lojtarë të Evertonit, pak çaste pas fishkëllimës së fundit të gjyqtarit.
Ai u desh të ndalej nga pjesa tjetër e bashkëlojtarëve në një situatë e cila u konsiderua si mjaft e tensionuar, pasi u përfshi edhe stafi i Chelseat në përpjekje për ta çuar atë në drejtim të tunelit.
Kjo humbje shkaktoi mjaft zemërim tek Chelsea, të cilët tashmë kanë hyrë në një seri prej dy humbjeve radhazi në Ligën Premier pasi paraprakisht kishin pësuar në udhëtim ndaj Manchester United.
Ata tashmë janë të pozicionuar në mes të tabelës me vetëm 14 pikë të grumbulluara pas 16 ndeshjeve të zhvilluara deri më tani në elitë.
Pas përfundimit të ndeshjes, kritika për lojtarët pati edhe trajneri i tyre Mauricio Pochettino.
“Futbolli ka të bëjë me shënimin e golave dhe ne nuk ishim aq të mirë para portës sot. Unë jam shumë, shumë i zhgënjyer”, kishte thënë shkurtimisht Pochettino pas ndeshjes./Telegrafi/