SHPËRNDAJE

Presidenti amerikan Donald Trump i është drejtuar botës pas takimit historik me liderin e Koresë së Veriut, Kim Jong-Un në Singapor.
Trump ka thënë se Koresë së Veriut do t’i hiqen sanksionet kur armët bërthamore të mos jenë më faktor për këtë vend.

Ai gjithashtu ka pranuar se përgatitjet për takimin e shumëpritur kanë zgjatur plotë tre muaj. Trump njëherit ka shfrytëzuar rastin të falënderojë liderët e Singaporit dhe Kinës që ndihmuan në organizimin e samitit.

“Kanë qenë orë të gjata. Po qëndroj para jush me porosinë për paqe dhe shpresë. Jemi të gatshëm të shkruajmë historinë dhe të përmirësojmë raportet mes popujve tonë, Kim e ka rastin të sigurojë një të ardhme më të mirë për popullin e tij. Çdokush mund të zhvilloj një luftë, por vetëm të guximshmit mund ta sjellin paqe”, ka shtuar i pari i Shtëpisë së Bardhë.
Lideri verikorean i ka premtuar presidentit amerikan se do të shkatërrojë poligonin e madh për testimin e motorëve të raketave.

“Koreja e Veriut tashmë ka filluar me shkatërrimin e poligonit të madh për testimin e motorëve të raketave”, ka shtuar Trump.

Trump është i bindur që Kim Jong-Un, do të respektoj marrëveshjen e nënshkruar nga të dy.